कञ्चनपुरमा विद्युतीय संरचनामा रु.७५ लाखभन्दा बढी क्षति

प्रकाशित मिति : Sat-29-Feb-2076
- Admin

कञ्चनपुर, जेठ । हावाहुरीका कारण कञ्चनपुरमा रहेका विद्युतका संरचनामा रु ७५ लाख भन्दा बढी क्षति पुगेको छ । हावाहुरीले विद्युत प्रशारण लाइनका पोल ढाल्नुका साथै, तार चुडालेको र ट्रान्सफर्मर पोलसँगै खस्दा सो रकम बराबरको क्षति भएको हो ।

नेपाल विद्युत प्राधिकरण महेन्द्रनगर वितरण केन्द्रका प्रमुख अवधेश कुमार गुप्ताका अनुसार हावाहुरीका कारण सबैभन्दा बढी कृष्णपुर नगरपालिकाको रैकवार विचवामा मात्रै १७४ पोल ढलेका तथा टुटेको जानकारी दिए ।

त्यस्तै, भीमदत्त नगरपालिकामा १००, बेलौरी वितरण केन्द्र अन्र्तगतका स्थानमा १ सय ५०, शुक्लाफाँटामा ३५ र बेदकोट नगरपालिकामा ३० ओटा पोल ढलेका छन् । जिल्लाका दुई स्थानमा पोलसँगै दुई वटा ट्रान्सफर्मर समेत खसेर नोक्सानी भएको छ ।

कार्यालय प्रमुख गुप्ताका अनुसार एक पोलमा रु १५ हजार बराबरको क्षति भएको छ । हावाहुरीसँगै ढलेका रुखहरु विद्युतीय संरचनामा खस्दा र तार चुड्दा प्राधिकरणले ठूलो नोक्सानी व्यहोर्नु परेको प्रमुख गुप्ताले बताए । अवरुद्ध विद्युत् सेवा सञ्चालनका लागि पोल राख्ने, तार जोड्ने लगायतका कार्य दु्रत गतिमा अगाडि बढेको उनले जानकारी दिए ।