काठमाण्डौ, जेठ । आगामी १० महिना भित्र न्यादी जलविद्युत आयोजनाबाट विद्युत उत्पादन हुने भएको छ । ३० मेगावाट क्षमताको उक्त आयोजनाले आगामी १० महिना भित्र विद्युत उत्पादन गर्ने भएको हो ।हाल आयोजनाको ७० प्रतिशत निर्माण कार्य सम्पन्न भइसकेको छ । न्यादी हाइड्रो पावर कम्पनीका कार्यकारी अधिकृत उत्तम अमात्यले  आयोजनाको मुख्य सुरुङ ढलानको काम भइरहेको बताए । उनका अनुसार ३.८४ किलोमिटर लामो सुरुङ ढलान ५० प्रतिशत सम्पन्न भएको छ । आयोजनाको बाँध क्षेत्रको संरचना बनाउन सुरु गरिएको उनले बताए ।

 आयोजनाबाट वार्षिक १६८.५५ गिगावाट घन्टा विद्युत उत्पादन हुनेछ । बुटवल पावर कम्पनी (बिपिसी) को सहायक कम्पनी न्यादी हाइड्रो पावर लिमिटेडले निर्माण गरिरहेको सो आयोजनाबाट उत्पादन हुने विद्युत मस्र्याङ्दी कोरिडोरको २२० केभी खुदी सबस्टेसनमा जोड्ने तय भएको छ । तर, विद्युत उत्पादन सुरु हुने अवधिभित्र प्रसारण लाइन तथा सबस्टेसनको काम पूरा नहुने निश्चित भएकाले वैकल्पिक रूपमा भुलभुले सबस्टेसनमा जोडिने कम्पनीले जनाएको छ । आयोजनामा एभरेष्ट बैंकको अगुवाईमा नबिल, ग्लोबल आइएमई, हिमालय, सनराइज बैंक र हाइड्रो इलेक्ट्रिसिटी इन्भेष्टमेन्ट एन्ड डेभलपमेन्ट कम्पनीले ऋण लगानी गरेका छन् । आयोजना सम्पन्न गर्न करिब ६ अर्ब रुपैयाँ खर्च हुने अनुमान छ ।