दार्चुला, चैत ।  नौगाड गाउँपालिकामा निर्माणाधीन अपर नौगाड साना जलविद्युत आयोजनाको ९५ प्रतिशत काम सम्पन्न भएको छ ।  ८ मेगावाट क्षमताको यो आयोजनाको ९५ प्रतिशत काम सम्पन्न भए सँगै १ महिना भित्र  सम्पन्न गर्ने भएको हो । 

अपर नौगाड आयोजनाका इन्चार्ज मधुसूदन कोइरालाका अनुसार आयोजनाको  सिभिलतर्फको काम अन्तिम चरणमा पुगेको छ भने हाइड्रो मेकानिकतर्फको केही काम भने अझै बाँकी रहेको बताए । दुई युनिटमा जडान हुने यो आयोजनाले एक महिनाभित्र एक युनिटबाट विद्युत उत्पादन गर्ने गरी तयारी भइरहेको उनले जानकारी दिए ।

 

 ‘पेनस्टकको अधिकांश काम पूरा भएको छ, पावरहाउसभित्र मेसिन जडान र सर्ज ट्यांक निर्माणको कार्य भइरहेको छ,’ उनले भने, ‘कुनै समस्या नआएमा बैशाखमै एक युनिटबाट विद्युत उत्पादन सुरु हुन्छ । ’पावरहाउसमा  ४ मेगावाट क्षमताका दुई वटा युनिट राखिने आयोजनाले जनाएको छ । पहिलो युनिटबाट एक महिना भित्र विद्युत् उत्पादन सुरु हुने र अर्को युनिटबाट विद्युत् उत्पादन सुरु गर्न थप एक महिना लाग्ने आयोजना इन्चार्ज कोइरालाको भनाइ छ । २०७५ साउनको बाढीले निर्माणाधीन आयोजनामा ठूलो भौतिक क्षति भएकाले चैतभित्रै निर्माण सम्पन्न हुन नसकेको हो । साउनको बाढीले मात्रै आयोजनामा १० करोडको क्षति भएको आयोजनाको दाबी छ । यो आयोजना अपि पावर कम्पनी लिमिटेडले निर्माण गरिरहेको छ । 

 

नौगाड गाउँपालिका ६ धुलिगडाको कुनेबगडदेखि फलामे पाइपमा पानी लगेर सुकेखोलाको पावर हाउसमा खसालिनेछ । पाइपलाइन (पेनस्टक) को लम्बाइ ५ किलोमिटर छ । २०७३ असोजदेखि निर्माण सुरु भएको आयोजनाको लागत १ अर्ब ४४ करोड रहेको इन्चार्ज कोइरालाले जानकारी दिए । अपर नौगाडमा उत्पादन भएको बिजुली शैल्यशिखर नगरपालिका १ बलाँचस्थित नेपाल विद्युत प्राधिकरणको चमेलिया सबस्टेसनमार्फत राष्ट्रिय प्रसारणमा जोडिनेछ । यसका लागि ९ किलोमिटर लामो ३३ केभीए प्रसारण लाइनको निर्माण सम्पन्न भइसकेको आयोजना इन्चार्ज कोइरालाले बताए । यसअघि प्रथम नौगाड जलविद्युत् आयोजनाले सुदूरपश्चिमका पहाडी जिल्लामा लोडसेडि· हटाउन नेपाल विद्युत् प्राधिकरणलाई ठूलो मद्दत गरेको इरालाको भनाइ छ ।