७० किलोवाटको सौर्य ऊर्जा परियोजना बन्द

प्रकाशित मिति : Tue-26-Nov-2075
- Admin

ठिनी, फागुन । ७० किलोवाटको सौर्य ऊर्जा परियोजना बन्द भएको छ । उपल्लो मुस्ताङको लोमान्थाङमा सञ्चालित उक्त सौर्य ऊर्जा परियोजना हिमपात र चिसोका कारण ब्याट्री चार्ज हुन नसकेपछि बन्द भएको हो ।

चार वर्षअघि चीन सरकारको रु एक करोड सहयोगमा सौर्य ऊर्जा परियोजना जडान गरेर भौगोलिकरूपमा विकट र दुर्गम क्षेत्रमा रहेको लोमान्थाङमा विद्युत आपूर्ति गरिदै आएको भएपनि सौर्य ऊर्जा स्टेशन चार्ज हुन नसक्दा गाउँ अन्धकार बनेको लोमान्थाङका रामबहादुर गुरुङले जानकारी दिए ।

उक्त सौर्य ऊर्जाबाट उपल्लो मुस्ताङका लोमान्थाङ, छोन्हुप, छोसेर र सुर्खाङ क्षेत्रका एक हजार ३६६ घरमा विद्युत सुविधा पुगेको थियो । राष्ट्रिय प्रसारण लाइन नपुगेको उपल्लो मुस्ताङ क्षेत्रमा ३० सौर्य प्यानलबाट उत्पादित उक्त विद्युतले लोमाङथाङ क्षेत्र उज्यालो बनेको थियो ।

लोमान्थाङ गाउँपालिका–१ का अध्यक्ष पेमा आङ्ग्या गुरुङका अनुसार चीन सरकारको आफ्नै प्राविधिक तथा आर्थिक सहयोगमा निर्माण गरिएको उक्त सौर्य ऊर्जा स्टेशन मर्मतका लागि उनीहरु नै आउनुपर्ने भएकाले तत्काल मर्मत गर्नसक्ने अवस्था नरहेकोे बताए ।