तिलाठी (सप्तरी), २१ पुस । जिल्लाको छिन्नमस्ता गाउँपालिकाले विद्युत् पहुँचबाट टाढा रहेका पालिकाभित्रका परिवारलाई निःशुल्क विद्युतीय मिटर वितरण गरेको छ । पालिकाभित्रका दलित समुदायका एकल र विपन्न ५९ महिलालाई पालिकाले हिजो निःशुल्क विद्युतीय मिटर उपलब्ध गराएको हो । 

 

मिटर हस्तान्तरण गर्दै पालिकाका अध्यक्ष विद्यानन्द चौधरीले विद्युत् पहुँच विस्तारसँगै आपूर्तिले उहाँहरूको जीवनयापन सहज हुने विश्वास व्यक्त गर्नुभयो । “विद्युत् पछिल्लो समय सबैका लागि आधारभूत आवश्यकता जस्तै बनेको छ । यसको अभावले ती परिवारले हरेक दिन अनेकौँ कठिनाइ भोगिरहनुभएको थियो । बत्ती नहुँदा बालबालिकाको पढाइमा बाधा, महिलाको घरधन्दा र सानातिना रोजगारीका काममा अप्ठ्यारो भएको”, उहाँले भन्नुभयो, “आर्थिक अभावले उहाँहरू सुविधाबाट बञ्जित हुनुहुन्थ्यो ।”

 

उज्यालोको सुविधा भएसँगै यहाँका ५९ परिवारको शिक्षा, रोजगारी र दैनिक कार्यमा सहज हुने बताएका छन् । छिन्नमस्ता गाउँपालिकाले आन्तरिक स्रोत र क्षमताभित्र रहेर आगामी दिनमा एकल महिला, विपन्न वर्ग र दलित समुदायलाई यस्ता सुविधा उपलब्ध गराउँदै जाने अध्यक्ष चौधरीले बताउनुभयो । मिटर वितरणले विद्युतीय चुहावट कम हुने र विद्युतीय दुर्घटनामा पनि कमी आउने उहाँले विश्वास व्यक्त गर्नुभयो ।