ऊर्जा, जलस्रोत तथा सिँचाइमन्त्रालयमा दीपक खड्का नियुक्त

प्रकाशित मिति : सोम, असार ३१, २०८१
- विद्युत संसार संवाददाता

काठमाडौं, ३१ असार । ऊर्जा, जलस्रोत तथा सिँचाइमन्त्रालयमा दीपक खड्काले नियुक्ती हुनुभएको छ ।

नवनियुक्त मन्त्री खड्काले आज बिहान राष्ट्रपति भवन शीतल निवासमा आयोजित विशेष समारोहमा राष्ट्रपति पौडेलसमक्ष पद तथा गोपनीयताको शपथ लिनुभएको हो ।

मन्त्री खड्का जलविद्युत् आयोजनाका प्रवर्द्धक हुनुहुन्छ । उहाँ १ सय २० मेगावाट क्षमताको निर्माणाधीन परियोजना लाङटाङ–भोटेकोसी जलविद्युत् परियोजना, ४.७२ मेगावाटको मेन्छियाम जलविद्युत् आयोजनाका प्रवर्द्धक हुनुहुन्छ ।

उहाँमाथि लैनचौरस्थित नेपाल स्काउटको १२ रोपनी जग्गा वर्षौंदेखि कब्जा गरेर आफ्नो निजी व्यवसायमा लगाएको आरोप लाग्दै आएको छ ।

संखुवासभाबाट प्रत्यक्ष निर्वाचित सांसद् खड्का पूर्वखानेपानी राज्यमन्त्री पनि हुनुहुन्छ ।