बुढीगण्डकी जलविद्युत आयोजनाको काम अघि बढाउन सरकारलाई पूर्वप्रधानमन्त्री डा.भट्टराईको ज्ञापनपत्र

प्रकाशित मिति : शुक्र, असार १४, २०८१
- भीमलाल श्रेष्ठ

काठमाडौं, १४ असार । पूर्वप्रधानमन्त्री एवम् नेपाल समाजवादी पार्टी (नेसपा)का अध्यक्ष डा. बाबुराम भट्टराईले बुढीगण्डकी जलविद्युत आयोजनाको काम अघि बढाउन माग गर्दै सरकारलाई ज्ञापनपत्र बुझाउनुभएको छ ।

प्रधानमन्त्री प्रचण्डलाई ज्ञापनपत्र बुझाउन डा. भट्टराई पार्टीका नेता र गोरखाका सांसदहरुसहित आज सिंहदरबार पुगेर बुढीगण्डकीलाई बहुउद्देश्यीय आयोजनाको रुपमा सन्चालन गर्नुपर्ने सहितको पत्र बुझाउनुभएको हो ।

पत्रमा अहिलेको विद्युत प्राधिकरण अन्तर्गतको सहायक कम्पनीको रूपमा रहेको कमजोर संरचनालाई खारेज गरी अधिकार र साधनस्रोत सम्पन्न ‘बुढीगण्डकी कोरिडोर विकास प्राधिकरण’ तुरुन्त गठन गर्नुपर्ने उल्लेख छ । अधिकार सम्पन्न प्राधिकरण मार्फत् समग्र बुढीगण्डकी कोरिडोर विकासका कामहरू अघि बढाउनुपर्ने र आयोजना प्रभावित नागरिकहरूका जायज मागहरूलाई सम्बोधन गर्नुपर्ने माग पनि उल्लेख छ ।

मागपत्र बुझाउने क्रममा डा.भट्टराईले बुढीगण्डकी बहुउद्देश्यीय आयोजनाको काम भदौ मसान्तभित्र सुरु गर्न सरकारलाई अल्टिमेटम दिइएको र समयमा काम सुरु नभए सशक्त आन्दोलन गर्ने जानकारी दिनुभयो ।