आयात रोकिएपछि उद्योगमा विद्युत् कटौती

प्रकाशित मिति : बुध, पौष २७, २०७९
- विद्युत संसार संवाददाता

काठमाडौं, पुस । भारतबाट विद्युत आयात प्रभावित भएको भन्दै नेपाल विद्युत प्राधिकरणले देशभरका औद्योगिक क्षेत्रहरुमा विद्युत कटौती सुरु गरेको छ ।

भारतमा बिजुली उत्पादन कटौती भएका कारण बिजुलीको आयात पनि प्रभावित भएकाले प्राधिकरणले केही दिनका लागि भन्दै उद्योगहरुलाई जानकारी गराएरै साँझ र बिहानको ‘पिक आवर’मा लाइन काट्न थालेको छ ।

नेपाल विद्युत प्राधिकरणका प्रवक्ता सुरेश बहादुर भट्टराई विहारमा आकस्मिक रुपमा उत्पादन प्रणालीमा समस्या आई आयात रोकिएकोले समस्या आएको बताउउनुभयो ।

करिब एक सय मेगावाटभन्दा बढी बिजुलीको आयात प्रभावित भएपछि उद्योगहरुमा समस्या आएको प्राधिकरणले जनाएको छ ।

बिहान ७ बजेदेखि ११ बजेसम्म र बेलुकी ५ बजेदेखि १० बजेसम्म भारतबाट भइरहेको आयात प्रभावित भएकाले केही दिनमै समस्या समाधान भएर बिजुली पूर्ववतः रुपमा आयात हुन थाल्ने प्राधिकरणको अपेक्षा रहेको छ ।