वीरगञ्ज, ९ भदौ  । नेपाल विद्युत् प्राधिकरणका कार्यकारी निर्देशक कुलमान घिसिङ र वीरगञ्ज महानगरपालिकाका प्रमुख राजेशमान सिंहबीच वीरगञ्जमा पछिल्लो पटक देखिएको विद्युत् आपूर्तिमा देखिएको विद्यमान समस्याबारे छलफल भएको छ ।

 

बुधबार काठमाडौँमा विद्युत् प्राधिकरण वीरगञ्ज वितरण केन्द्रका प्रमुख जीतेन्द्र झासँगै घिसिङलाई भेटेर महानगरप्रमुख सिंहले वीरगञ्जमा विद्यमान विद्युतसँग सम्बन्धित समस्याबारे जानकारी गराउनुभएको थियो । त्यस क्रममा उहाँले अहिले भइरहेको अनियमित विद्युत् कटौतीको समस्या तत्काल समाधान गरिदिन घिसिङसँग आग्रह गर्नुभयो ।

 

प्रमुख सिंहले वीरगञ्जमा सडकबत्ती व्यवस्थापनका लागि फिप्थ वायर जडान, भूमिगत तार व्यवस्थापन, पानी ट्याङ्की क्षेत्रका घरमाथिको हाईटेन्सन लाईन स्थानान्तरण र बाइपास इनर्वा क्षेत्रको हाइटेन्सन लाइन स्थानान्तरण गर्नुपर्ने  विषयमा जानकारी गराउनुभएको थियो । कार्यकारी निर्देशक घिसिङले प्रस्तुत समस्या समाधानका लागि प्रक्रियामा लैजान वीरगञ्ज वितरण केन्द्रले कार्य अघि बढाउने आश्वासन दिनुभएको छलफलमा सहभागी प्रमुख सिंहका स्वकीय सचिव सत्यराज घिमिरेले जानकारी दिनुभयो ।