आइस्पानले बन्द नगर्ने भयो इन्टरनेट सेवा

प्रकाशित मिति : मंगल, बैशाख २०, २०७९
- विद्युत संसार संवाददाता

काठमाडौं, बैशाख । इन्टरनेट सेवा प्रदायक संघ नेपाल (आइस्पान) ले बन्द गर्ने भनिएको इन्टरनेट सेवा बन्द नहुने भएको छ । सञ्चार तथा सूचना प्रविधि मन्त्रालयले अपस्ट्रिम प्रोभाइडर्स जस्ता कम्पनीलाई भुक्तानी गर्न विदेशी मुद्रा सिफारिस गर्न पूर्ण रूपमा बन्द गरेका कारण बन्द गर्ने भनिएको इन्टरनेट सेवा बन्द नहुने भएको हो ।

गत शनिबार आइस्पानले विज्ञप्ति जारी गर्दै सरकारले विदेशी मुद्रा सिफारिसमा रोक लगाएका कारण देशव्यापी बन्द हुने भनिएको थियो ।

आइस्पानका अध्यक्ष सुधिर पराजुलीले इन्टरनेट सेवा बन्द भएमा त्यसको सम्पूर्ण जिम्मेवारी सरकारले लिनुपर्ने बताएका थिए ।

सोमबार आइस्पानका प्रतिनिधि र सञ्चार तथा सूचना प्रविधि मन्त्री ज्ञानेन्द्रबहादुर कार्कीबीच भएको भेटमा मन्त्री सकारात्मक देखिएपछि समस्या समाधान हुने भएको हो ।

नेपालका इन्टरनेट सेवा प्रदायकहरूले भारतको टाटा, एयरटेल र सिफ्फीबाट व्यान्डविथ खरिद गर्दै आएका छन् । कम्पनीले विगत ६ महिनादेखि भारतीय कम्पनीलाई शुल्क भुक्तानी गर्न नसक्दा आगामी हप्ताबाट देशभर इन्टरनेट बन्द हुने स्थिति आएको पराजुलीको भनाई छ । सञ्चार मन्त्रालयले लामो समयदेखि बेरुजु देखाएर भुक्तानी रोकिदिएको थियो ।

छ महिनादेखि ब्यान्डविथको रकम भुक्तानी गर्न नसकेपछि भारतीय कम्पनीले इन्टरनेट बन्द गर्ने चेतावनी दिएको पराजुलीले बताए ।

सोमबार मन्त्रालयले सेवा प्रदायकहरूको ब्यान्डविथको डलर सिफारिस पत्र दर्तासमेत गरिदिएसँगै ै बेरुजुको विषय समाधान हुने उनको विश्वास छ ।