काठमाडौं, १६ फागुन । सङ्खुवासभामा निर्माण सम्पन्न ८।५ मेगावाटको माथिल्लो हेवा खोला जलविद्युत आयोजनाको विद्युत आइतबार देखि राष्ट्रिय प्रसारण प्रणालीमा जोडिएको छ । आयोजनाको निर्माण सम्पन्न गरी आइतबारदेखि एउटा युनिटबाट उत्पादित एक मेगावाट विद्युत ३३ केभी लाइन मार्फत विद्युत कोशी कोरिडोर प्रसारण लाइनको बानेश्वर सबस्टेसनमा जोडिएको छ । अर्को युनिटको विद्युत क्रमश राष्ट्रिय प्रसारण लाइनमा जोडिदै जाने कम्पनीको भनाइ छ ।

 

हाल आयोजनाले परीक्षण उत्पादन गरी नेपाल विद्युत प्राधिकरणलाई निशुल्क विद्युत दिएको छ । २ साता परीक्षणको चरण पूरा भएपछि आयोजनाबाट व्यापारिक उत्पादन सुरु  गरिने कम्पनीले जनाएको छ ।

गत साउनमा नै सम्पन्न गर्ने तालिका रहेको आयोजना कोरोना भाइरसको असर र बर्खाको बाढीले पुर्याएको क्षतिका कारण विद्युत उत्पादन अवधि लम्बिएको कम्पनीले जनाएको छ । 

 

आयोजना सम्पन्न भई सञ्चालनमा आउँदा १ अर्ब ४१ करोड रुपैयाँ खर्च भएको छ । आयोजनामा एनएमबी बैंकको अगुवाइमा नेपाल बैंक र कृषि विकास बैंकले ७० प्रतिशत ऋण लगानी गरेका छन् । बाँकी ३० प्रतिशत स्वपुँजी लगानी छ । माथिल्लो हेवामा लगानी गरेको समूहले नै यसअघि साढे ४ मेगावाटको हेवा आयोजना निर्माण सम्पन्न गरी प्रणालीमा जोडिसकेको छ ।