सोलुखोला दूधकोसी जलविद्युत् आयोजनाको सुरुङ मार्गमा दुर्घटना

प्रकाशित मिति : बिही, माघ १३, २०७८
- विद्युत संसार संवाददाता

काठमाडौं, माघ । सोलुखुम्बुमा निर्माणाधिन ८६ मेगावाट क्षमताको सोलुखोला दूधकोसी जलविद्युत् आयोजनाको ठाडो सुरुङ मार्गबाट खसेर दुर्घटना हुँदा एक मजदूर बेपत्ता भएका छन् । दूधकोशी गाउँपालिका ३ पञ्चन क्षेत्रको सुरुङमार्गमा जाने क्रममा ‘बकेट’ चुँडिदा एक जना मजदूर घाइते अवस्थामा भेटिएको र एक जना बेपत्ता भएको प्रहरीले जनाएको छ ।

सोलुखुम्बुका प्रहरी निरीक्षक ऋषिराज ढकालका अनुसार प्रहरीका अनुसार बेपत्ता हुनेमा बारा जिल्ला कोलभी नगरपालिका–१ का २४ वर्षीय राकेश चौधरी रहेको जानकारी दिए । उनका अनुसार दुर्घटनामा घाइते भएका पर्सा जिल्ला पटेरवा गाउँपालिका–४ का २० वर्षीय अंकित चौधरी रहेको र घाइतेलाई एम्बुलेन्समार्फत मिसन अस्पताल ओखलढुङ्गा पठाइएको छ । बिहान करिब ४ बजे पाइप निकाल्ने क्रममा यो दुर्घटना भएको प्रहरीले जनाए । घटनामा परेका अन्य दुई जनाको अवस्था भने सामान्य रहेको प्रहरी निरीक्षक ढकालले बताए ।

हराइरहेका चौधरीको खोजी कार्य जारी रहेपनि अन्य निर्माण सामग्रीका कारण समस्या भइरहेको प्रहरीले जनाएको छ । सुरुङ मार्गभित्र मानिसका साथै निर्माण सामग्री ढुवानीका लागि मेसिनद्वारा सञ्चालन हुने बकेट प्रयोग गर्ने गरिएको आयोजनाले जनाएको छ ।