अझै जोडिएन अन्तर्राष्ट्रिय क्रिकेट रंगशालाको बिजुली

प्रकाशित मिति : शुक्र, पौष १६, २०७८
- विद्युत संसार संवाददाता

पुस, चितवन । नेपाल विद्युत प्राधिकरण भरतपुर वितरण केन्द्रले लामो समयदेखि विद्युत महशुल नतिरेपछि पुस ७ गते देखि काटेको धुर्मुस सुन्तली फाउन्डेसनको लाइन अझैपनि जोडिएको छैन ।

धुर्मुस सुन्तली फाउन्डेसनले भरतपुर महानगरपालिका–१६ मा निर्माण गरिरहेको गौतमबुद्ध अन्तर्राष्ट्रिय क्रिकेट रंगशालाका लागि धुर्मस सुन्तली फाउण्डेशनले लिएको विद्युतको बक्यौता रकम हालसम्म पनि नतिरेको र रंगशालाबाट कुनै पनि सहमति गर्न नआएका कारण बिजुली पुन नजोडिएको नेपाल विद्युत प्राधिकरण भरतपुर वितरण केन्द्रका सहायक प्रशासकीय अधिकृत अच्युत विष्टले बताए ।

अधिकृत विष्टका अनुसार फाउण्डेशनले करिब १३ लाख बक्यौता प्राधिकरणलाई तिर्न बाँकी रहेको भन्दै प्राधिकरणले दैनिक रुपमा बक्यौता नतिर्ने ग्राहकहरुको लाइन काट्ने गरिएको जानकारी दिए । बक्यौता तिर्न आए तत्काल नै बिजुली जडान गरिने विष्टको भनाई छ ।