कात्तिक, काठमाडौं । नवलपरासी जिल्ला (बर्दघाट सुस्तापूर्व)को विनयी त्रिवेणी गाउँपालिकास्थित सर्दीमा रहेको होङ्शी शिवम् सिमेन्टमा शनिबारदेखि राष्ट्रिय प्रसारण (ग्रिड) को विद्युत् पुगेको छ ।

नेपाली र चिनियाँ लगानीकर्ताको साझेदारीमा सञ्चालन भई २०७५ जेठबाट उत्पादन शुरु गरेको करिब उद्योगमा साढे तीन वर्षपछि राष्ट्रिय प्रसारणको विद्युत् पुगेको हो । 

 

नेपाल विद्युत प्राधिकरणले बर्दघाटमा रहेको सबस्टेसनबाट बर्दघाट-सर्दी १३२ केभी प्रसारण लाइनमार्फत उद्योगमा शनिबारबाट प्राधिकरणले विद्युत आपूर्ति दिएको छ । वन क्षेत्रको जग्गा प्रयोग, स्थानीयको अवरोधजस्ता धेरै समस्या कारण प्रसारण लाइनको निर्माण अझै नसकिएता पनि वैकल्पिक व्यवस्था गरी उद्योगलाई विद्युत दिइएको प्राधिकरणका कार्यकारी निर्देशक कुलमान घिसिङले बताए । उद्योगका लागि निर्माण भइरहेको बर्दघाट-सर्दी १३२ केभी प्रसारण लाइन आयोजनाको निर्माणमा केही ढिला हुने भएपछि वैकल्पिक व्यवस्था गरी बिजुली दिइएको छ । ‘मुलुकभित्र उत्पादित विद्युतको आन्तरिक खपत बढाउन ठूला उद्योगहरुले मागेजति विद्युत दिने तयारी भइरहेकोले गुणस्तरीय, भरपर्दो र पर्याप्त विद्युत आपूर्तिका लागि प्रसारण तथा वितरण लाइन र सबस्टेसनहरुको क्षमता बढाउने, सदृढीकरण गर्नेलगायतका काम अभियानकै रुपमा चलाइएको बताउँदै यसको नतिजा छिट्टै देखिने छ, उनले सँगसँगै थपे ठूला उद्योग स्थापनालाई प्रोत्साहन गर्न पनि विद्युत महसुललाई समयानुकूल पुनरावलोकन गर्दै लैजाने छौं । 

 

हालसम्म थर्मल प्लान्टबाट उत्पादित बिजुलीमा निर्भर रहेको उद्योगलाई उत्पादन क्षमता थप गर्न लागेको उद्योगलाई थप ५० मेगावाट विद्युत चाहिएपनि हाल ३० मेगावाट विद्युत खपत हुने गरी शनिबार राति ९ बजे चार्ज गरी उद्योगलाई १३२ केभी प्रसारण लाइनमार्फत सिधै विद्युत आपूर्ति दिइएको प्राधिकरणले जनाएको छ  । 

 

११ र ३३ केभी प्रसारण लाइनबाट विद्युत आपूर्ति लिने ग्राहककोभन्दा १३२ केभीको महसुल सस्तो छ । विद्युत् लाइन पुग्न नसक्दा उद्योगले १.४ मेगावाटका १४ वटा डिजेल जेनेरेटरमार्फत विद्युत आपूर्ति गरिरहेको थियो । यसका लागि दैनिक रुपमा ६० हजार लिटर डिजेल खपत गर्दै आएको उद्योगले जनाएको छ ।

 

उद्योग, वाणिज्य तथा आपूर्ति मन्त्रालयको सिमन्ट उद्योगसँग विद्युत् पुर्याउने घोषणा अनुसार बर्दघाट-सर्दी १३२ केभी २० किलोमिटर डबल सर्किट प्रसारण लाइन बनिरहेको छ । नेपाल विद्युत प्राधिकरणका सञ्चालक भक्तबहादुर पुन, कार्यकारी निर्देशक कुलमान घिसिङ, वितरण तथा ग्राहक सेवा निर्देशनालयका उपकार्यकारी निर्देशक मनोज सिलवाल, प्रसारण निर्देशनालयका उपकार्यकारी निर्देशक दीर्घायुकुमार श्रेष्ठलगायतको टोलीको उपस्थितिमा प्रसारण लाइन चार्ज गरी उद्योगलाई विद्युत आपूर्ति दिएको हो ।