पेट्रोलियम पदार्थको मूल्य वृद्धिको विरोधमा नेपाल बन्दको घोषणा

प्रकाशित मिति : बिही, कार्तिक २५, २०७८
- विद्युत संसार साप्ताहिक

काठमाडौं, कात्तिक । सरकारले पछिल्लो समयमा निरन्तर रुपमा बढाउँदै आइरहेको पेट्रोलियम पदार्थको मूल्यवृद्धिको विरोधमा नेपाल बन्द गर्ने घोषणा गरेको छ । जनताको दैनिक जीवनसँग जोडिएका पेट्रोलियम तथा खाद्यवस्तु जस्ता अत्यावश्यक वस्तुमा नेपाल सरकारले निरन्तर मूल्यवृद्धि गरेको भन्दै नेपाल कम्युनिस्ट पार्टी (विप्लव) ले आज एक विज्ञप्ति जारी गरेर नेपाल बन्द गर्ने घोषणा गरेको हो ।

विप्लवले यहि कात्तिक २५ गते देशव्यापी विरोध प्रदर्शन कात्तिक २६ गते प्रचार प्रसार र साँझ मशाल जुलुस, कात्तिक २७ गते देशव्यापी प्रदर्शन, कात्तिक २८ गते चक्का जाम, कात्तिक २९ गते दिउँसो सिट्टी जुलुस तथा साँझ मशाल जुलुस र कात्तिक ३० गते नेपाल बन्द गरिने विज्ञप्तिमा उल्लेख गरिएको छ ।

विप्लवको विज्ञप्तिमा भनिएको छ, “जनताको दैनिक जीवनसँग जोडिएका पेट्रोलियम तथा खाद्यवस्तु जस्ता अत्यावश्यक वस्तुमा नेपाल सरकारले निरन्तर मूल्यवृद्धि गर्दै आएको र यसप्रकारको सरकारी दोहनलाई जनताले निरीहतापूर्वक पालना गर्नुपर्ने वाध्यता जस्तै बनेको तथ्य हाम्रो सामु छ । भर्खरै मात्र पनि पेट्रोल, डिजेल, मट्टितेलमा प्रतिलिटर ३ रुपैयाँ, आन्तरिक तथा बाह्य हवाई इन्धनमा प्रतिलिटर ५ रुपैयाँ र खाना पकाउने एलपी ग्यासमा ७५ रुपैयाँका हिसाबले मूल्य वृद्धि गरियो । जसअनुसार रु. ४७ मा आयात गरिने पेट्रोलियम रु १३३ मा बिक्रि गरिने छ । विज्ञहरूले मापन गरे अनुसार सबै कर कट्टा गर्दा पनि मुनाफा सहित पेट्रोल रु. ७० मा बिक्रि गर्न सकिन्छ । दैनिक रुपमा असुल गरिने यो सरकारी लुट कुन प्रयोजनमा लगानी गरिन्छ ?

पेट्रोलियम पदार्थमा गरिएको मूल्य वृद्धिले निश्चित रुपमा यातायात लगायत आयात गरिने सवै सामानहरूको मूल्यमा पनि वृद्धि हुनेछ । भखरै भएको मूल्य वृद्धिसँगै जनताले एकातिर करिव २०० प्रतिशत बढी मूल्य भुक्तानी गर्न विवश हुनेछन् भने अर्कोतिर त्यसको प्रभावले सार्वजनिक यातायातसहित ढुवानी गरिने सम्पूणर् सरसामानहरूमा मूल्यवृद्धि हुनेछ । यसबाट नेपाली उपभोक्ता कैयौं गुणा बढी मारमा पर्नेछन् । हाम्रो पार्टी जनसरोकारको यो अन्यायपूणर् उत्पीडनलाई मुकदर्शक भएर हेरिरहन सक्दैन । तसर्थ सम्पूणर् मूल्यवृद्धिका विरुद्ध सशक्त प्रतिरोध सङ्घर्षमा उत्रन पार्टीका सबै जनवर्गीय सङ्गठन र समस्त जनसमुदायमा हार्दिक अपिल गर्दछ । साथै जनभावनाको कदर गर्दै मूल्यवृद्धि तुरुन्त खारेज गर्न सरकारसंग पनि अपिल गर्दछ।“