बैंकिङ प्रणालीबाट १८ अर्ब रुपैयाँ एउटै निकायले निकालेर भारत पठाउँदै, आयल निगमको पैसा झिक्न छलफल

प्रकाशित मिति : बिही, कार्तिक ११, २०७८
-

काडमाडौं। मासिक साढे चार अर्ब नोक्सानी ब्योहोरेपछि नेपाल आयल निगमले बैंकिङ प्रणालीमा भएको १८ अर्ब रुपैयाँ निकाल्ने भएको छ। अन्तर्राष्ट्रिय बजारमा कच्चा तेलको मूल्य बढेपछि निगम मासिक रुपमा अहिलेसम्मकै बढी नोक्सानीमा छ।

निगमसँग मूल्य स्थिरीकरण कोषमा १२ अर्ब र रिर्जभमा ६ अर्ब रुपैयाँ छ। यो सबै वाणिज्य बैंकमा निक्षेपको रुपमा राखिएको छ। नोक्सानी साढे चार अर्ब भएपछि आपूर्ति सहज बनाउन बैंकमा भएको निक्षेप निकाल्न लागिएको हो।

निगमका कार्यकारी निर्देशक सुरेन्द्र पौडेलले बैंकर्स संघका अध्यक्ष भुवन दहालसँग पैसा निकाल्ने बारेमा प्रारम्भिक छलफल गरिसकेका छन्। विस्तृत छलफल भने हुन बाँकी छ।

निगमको विभिन्न बैंकहरुमा कम्तिमा ५० करोडका दरले १८ अर्ब रुपैयाँ छ। यसमध्ये ६ अर्ब चालु खातामा छ। बाँकी १२ अर्ब मुद्दती निक्षेपमा छ। चालु खाताको पैसा जुनसुकै बेला चलाउन पाइन्छ।

मुद्दतीको पैसा पनि तीन महिनाभित्र सबै परिपक्व हुँदैछ। परिपक्व हुँदै गएका निक्षेप झिक्दै पेट्रोलियम खरिद गर्ने निगमको तयारी छ। यो निक्षेप प्रणालीबाटै बाहिरिने छ। यो पैसा भारत जाने छ। यसपछि बैंकिङ प्रणालीमा तरलता अभाव थप चर्किने सम्भावना रहन्छ।

-बिजमाण्डू