कोरोनाका कारण एलपी ग्यास आपूर्ति प्रभावित हुन सक्ने आशंका
- प्रकाशित मिति : शुक्र, बैशाख १०, २०७८
- - विद्युत संसार संवाददाता
खाली सिलिन्डर भरेर राख्न उपभोक्तालाई ग्यास उद्योग संघको अपिल
काठमाडौं, बैशाख । नेपालमा दिन दुई गुणा रात चौगुणाका दरले कोरोना संक्रमणको दर बढिरहेको छ । नेपालमा जस्तै छिमेकी मुलुक भारतमा पनि कोरोना संक्रमणको दर बढिरहेकोले एलपी ग्यास आपूर्ति प्रभावित हुन सक्ने भन्दै नेपाल एलपी ग्यास उद्योग सङ्घले उपभोक्ताहरुलाई आफूसँग भएको खाना पकाउने खाली ग्यास सिलिन्डर भरेर राख्न उपभोक्तासँग आग्रह गरेको छ ।
विगतमा कोरोनाका कारण भएको लकडाउनमा पनि ग्यास आपूर्ति अभाव हुन नदिएको र फेरि कोरोना संक्रमण बढ्दै गएकोले आपूर्ति प्रभावित हुने आशङ्कामा खाली ग्यासका सिलिन्डर तत्काल भरेर भण्डारण गर्न सङ्घले आग्रह गरेको हो ।
सहज तरिकाले आपूर्ति व्यवस्था गर्न नेपाल आयल निगमले बुधबार सङ्घलाई खाली सिलिन्डर भरेर भण्डारण गर्न पत्राचार गरेको थियो । सोहीअनुसार सङ्घले उपभोक्तालाई खाली सिलिन्डर भर्न अपिल गरेको छ ।
