रुरुको आईपीओ आज देखि निष्कासन, कहिले सम्म दिन सकिन्छ आवेदन ?

प्रकाशित मिति : शनि, चैत २१, २०७७
- विद्युत संसार संवाददाता

काठमाडौं, चैत । रुरु जलविद्युत आयोजनाले आज शुक्रबारदेखि आइपीओ निष्कासन गरेको छ ।

कम्पनीले रु.१०० अंकित दरमा रु.२० रुपैंया थप गरेर रु.१२० रुपैंया प्रतिशेयरका दरले ४ लाख ७ हजार ७ सय ६ कित्ता आईपीओ निष्कासन गरेको हो ।

निजी क्षेत्रबाट प्रवद्र्धित उक्त परियोजनाले खुल्ला गरेको आइपीओमा छिटोमा चैत्र २४ गतेसम्म र त्यस अवधिमा माग अनुसार आवेदन नपरेमा बैशाख ३ गतेसम्म आवेदन दिन सकिने छ । यसमा न्यूनतम १० देखि अधिकतम सम्पूर्ण कित्ताका लागि आवेदन दिन सकिने बिक्री प्रबन्धक एनएमबि क्यापिटल लिमिटेडले जनाएको छ ।

प्रिमियम मूल्यमा आईपीओ निष्कासन गर्ने रुरु पहिलो जलविद्युत कम्पनी हो । कम्पनीले निष्कासन गरेको आईपीओमध्ये ८ हजार १ सय ५४ कित्ता कर्मचारीलाई, २० हजार ३ सय ८५ कित्ता म्युचुअल फन्डलाई छुट्याइएको छ भने बाँकी ३ लाख ७९ हजार १ सय ६७ कित्ताका लागि सर्वसाधारणलाई छुट्याइएको छ ।

लगानीकर्ताले सि–आस्वा प्राप्त बैंक तथा वित्तीय संस्था तथा मेरो सेयरमार्फत सेयर भर्न सक्नेछन् । इक्रा नेपाल लिमिटेडले रुरुलाई ग्रेड ३ रेटिङ दिएको छ । कम्पनीले गुल्मीको माथिल्लो हुग्दी खोलामा ५ मेगावाट क्षमताको विद्युत उत्पादन गरिरहेको छ । माथिल्लो हुग्दीले २०७१ चैतदेखि विद्युत थालेको हो ।