२ लाख ६४ हजार आवेदकले मात्र आइपीओ पाउने 

 

काठमाडौं, चैत । सिंगटी हाइड्रो इनर्जीले चैत ६ गतेबाट १० गतेसम्म १ सय रुपैयाँका दरले खुलाएको आइपीओको बाँडफाँट यसै साताभित्र हुनसक्ने सम्भावना रहेको छ ।

आइपीओ बाँडफाँटको जिम्मा पाएको कम्पनी मेगा क्यापिटलका अनुसार केही मात्रामा आवेदन रुजु गर्ने काम बाँकी रहेको र रुजु गर्ने काम सकिए लगतै बाँडफाँट गरिने जनाएको छ । 

 

आवेदन रुजु गर्ने काम अझै बाँकी रहेका कारण बाँडफाँट गर्ने मितिको टुंगो भने लागेको छैन । रुजुको काम सकिएमा यसै साता बाँडफाँट हुने र नसकिएमा अर्को साता लाग्ने बिक्री प्रबन्ध मेगा क्यापिटलले जनाएको छ । कम्पनीको शेयर गोलाप्रथाबाट बाँडफाँट हुने छ ।  

कुल २९ लाख कित्ता आइपीओ निष्कासन गरेकोमा माग भन्दा ९.३४ गुणा बढी आवेदन परेको क्यापिटलले जनाएको छ । जसमा १६ लाख ३५ हजार ५ सय ३७ जनाले २ करोड ४६ लाख ६५ हजार ६ सय ४० कित्ताका लागि आवेदन परेको छ । जसमा कुल २ अर्ब ४६ करोड ६५ लाख ६४ हजार रुपैयाँ बराबरको आवेदनबाट संकलन भएको छ ।

 

सर्वसाधारणलाई बिक्री गरिएको २६ लाख ९४ हजार कित्तालाई आधार मान्दा आवेदन दिएका मध्येबाट २ लाख ६४ हजार जना आवेदकले मात्र १० कित्ताका दरले शेयर पाउने र १३ लाख ७१ हजार ५ सय ३७ जनाले आइपीओ पाउनबाट बञ्चित हुने छ । जसमध्ये ५८ हजार कित्ता कर्मचारी र १ लाख ४५ हजार कित्ता म्युचुअल फन्डहरुलाई छुट्याएर बाँकी २६ लाख ४० हजार कित्ता सर्वसाधारणका लागि बिक्री खुला गरिएको थियो । यो आइपीओलाई क्रेडिट रेटिङ एजेन्सी केयर नेपालले ‘केयर एनपी डबल बी माइनस इस्यूअर रेटिङ प्रदान गरेको छ । 

 

कम्पनीको हाल चुक्ता पुँजी १ अर्ब १ करोड ५० लाख रुपैयाँ रहेको छ । आयोजना प्रभावित क्षेत्रका बासिन्दाहरूबाट १४ करोड ५० लाख रुपैयाँ र सर्वसाधारणबाट २९ करोड रुपैयाँ बराबरको आईपीओ निष्कासनपछि कम्पनीको चुक्ता पुँजी एक अर्ब ४५ करोड रुपैयाँ पुग्नेछ ।

 

त्यस्तै सिंगटीले दोलखा जिल्लाको कालिन्चोक गाउँपालिका वडा नं. ३ स्थित सिंगटी बजार नजिक रहेको २५ मेगावाट क्षमताको ‘सिंगटी खोला जलविद्युत आयोजना’ निर्माण गरिरहेको छ । यसको कुल लागत ५ अर्ब ५० करोड ४६ लाख ६८ हजार रुपैयाँ अनुमान गरिएको छ ।