सिंगटी हाइड्रो इनर्जीको आईपीओ आजबाट खुला

प्रकाशित मिति : शुक्र, चैत ६, २०७७
- विद्युत संसार संवाददाता

काठमाडौं, चैत । आजबाट सिंगटी हाइड्रो इनर्जी लिमिटेडले सर्वसाधरणका लागि साधारण शेयरको (आईपीओ) निष्कासन गरेको छ । कम्पनीले एक सय रुपैयाँ अंकित २९ लाख कित्ता शेयर मध्ये ५८ हजार कित्ता अर्थात दुई प्रतिशत शेयर कर्मचारीलाई छुट्याएको छ ।

यसले एक लाख ४५ हजार कित्ता अर्थात पाँच प्रतिशत सामूहिक लगानी कोषलाई बाँडफाँड गरेर बाँकी रहेको २६ लाख ९७ हजार कित्ता साधारण शेयरको आजबाट सार्वजनिक निष्कासन गरेको हो । यसको आईपीओ छिटोमा चैत १० गते र ढिलोमा चैत २० गते बन्द हुने भएको छ ।

सिंगटी हाइड्रो इनर्जीको आईपीओ न्यूनतम १० कित्तादेखि अधिकतम दुई लाख कित्तासम्मका लागि आवेदन दिन पाइनेछ । कम्पनीको सेयर निष्कासन तथा बिक्री प्रबन्धकमा मेगा क्यापिटल्स मार्केट्स रहेको छ ।

पछिल्लो समय आईपीओमा सर्वसाधारणको आकर्षण बढेकोले माग भन्दा बढी आवेदन पर्ने गरेको छ । यसको आईपीओमा पनि मागभन्दा बढी आवेदन पर्ने हुँदा सर्वसाधारणले १० कित्ता मात्रै आवेदन दिए पनि पुग्छ । यसको शेयर आवेदन भने १० देखि २ लाख कित्तासम्मको लागि दिन पाइन्छ ।