फेरि २ रुपैंया बढ्यो पेट्रोलियम पदार्थको मूल्य

प्रकाशित मिति : बुध, चैत ४, २०७७
- विद्युत संसार संवाददाता

चैत, काठमाडौं । नेपाल आयल निगमले पेट्रोलियम पदार्थको मूल्य पुन बढाएको छ ।

पेट्रोल , डिजेल तथा मटितेलको साबिकको खुद्रा बिक्री मूल्यमा प्रतिलिटर २ रुपैयाँ मूल्य बढेको हो ।

निगमले मंगलबार राति १२ बजेदेखि लागुहुने गरी मूल्य बढाएको छ । नयाँ मूल्य सूचिअनुसार खुद्रा मूल्य अब पेट्रोल प्रतिलिटर ११८ र डिजेल १०१ रुपैयाँ पुगेको छ ।

त्यस्तै हवाई इन्धन (आन्तरिक उडानतर्फ)को साविकको खुद्रा बिक्री मूल्यमा प्रतिलिटर २ रुपैयाँले वृद्धि गरेर ७४ रुपैयाँ कायम गरिएको छ । एलपी ग्यास तथा हवाई इन्धन (अन्तर्राष्ट्रिय उडान तर्फ) को खुद्रा बिक्री मूल्य यथावत नै कायम राखिएको निगमका प्रवक्ता विनितमणि उपाध्यायले जानकारी दिए ।

यो मूल्य समायोजन पछि पनि निगमलाई पेट्रोलमा प्रति लिटर रू. ९.३५, डिजेलमा प्रति लिटर रू. ५.८० र एलपी ग्यासमा प्रति सिलिण्डर रू. ३९२.८२ घाटा कायम रहने उनले बताए । अर्धमासिक रूपमा निगमलाई करिब १ अर्व २७ करोड ७० लाख घाटा रहिरहने उपाध्यायले जानकारी दिए ।

सो घाटा रकम मूल्य स्थिरिकरण कोष तथा निगमको संचित नाफाबाट व्यवस्थापन गरिने गरिने उनले बताए । पछिल्ला महिनामा सरकारले पटक–पटक पेट्रोलियम पदार्थमा मूल्य वृद्धि गर्दै आएको छ ।