ट्रान्समिटर पड्केर आगलागी, ४० लाख बराबरको क्षति

प्रकाशित मिति : Tue-02-Mar-2021
- विद्युत संसार संवाददाता

तनहुँ, फागुन । तनहुँको व्यास नगरपालिका–४ स्थित होटल सःसः इनमा गए राति आगलागी भएको छ । होटल नजिकै रहेका तरकारी लाइन नजिकैको ट्रान्समिटर पड्किएर आगलागी भएको हो ।

करिब २ः०० बजेको समयमा आगलागी हुँदा करिब रु ४० लाख बराबरको क्षति भएको र मानवीय क्षति भने नभएको जिल्ला प्रहरी कार्यालय तनहुँले जनाएको छ ।

प्रहरीका अनुसार विद्युत् लाइनबाट विद्युत् चुहिएर आगलागी भएको हुनसक्ने अनुमान छ । घटनालगत्तै घटनास्थलमा व्यास नगरपालिकाको दमकल, नेपाल प्रहरी, स्थानीयवासीको सहयोगमा आगो निभाइएको जिल्ला प्रहरी कार्यालय तनहुँका प्रहरी नायब उपरीक्षक युवराज तिमिल्सिनाले जानकारी दिए । होटलको पहिलो तलामा रहेको आगन्तुककक्ष जलेर पूर्णरूपमा क्षति भएको छ ।