माथिल्लो पिलुवा खोला–३ जलविद्युत आयोजनामा लक्ष्मी र माछापुच्छ्रे बैंकले गरे ऋण लगानी

प्रकाशित मिति : मंगल, फागुन ११, २०७७
- Admin

काठमाडौं, फागुन । ४.९५ मेगावाटको माथिल्लो पिलुवा खोला–३ जलविद्युत आयोजनामा लक्ष्मी र माछापुच्छ्रे बैंकले ऋण लगानी गर्ने भएका छन् ।

दुई वाणिज्य बैंकहरुले सहवित्तीयकरण अन्तर्गत कर्जा लगानी गर्नेगरी सोमबार सम्झौतामा हस्ताक्षर गरेका हुन् । उक्त आयोजनाको निर्माण लागत ९३ करोड ७० लाख रुपैयाँ रहेको छ ।

उक्त जलविद्युत् आयोजना संखुवासभा जिल्लाको सिद्धकाली र मावादिन गाविसहरुमा अवस्थित पिलुवा र सिखुवा खोलामा निर्माण हुुँदैछ ।

आयोजनाको कम्पनी माबिलुङ्ग इनर्जी लि. र नेपाल विद्युत प्राधिकरणबीच विद्युत खरिद सम्बन्धी सम्झौता २०७५ चैत १२ गते भएको थियो ।

उक्त आयोजना निर्माणको लागि उर्जा मन्त्रालयबाट २०७७ साउन ९ गते विद्युत उत्पादन अनुमति प्राप्त भएको छ ।

माबिलुङ्ग इनर्जी लि. लाई एशियन लाइफ इन्स्योरेन्स कम्पनी, गुहेश्वरी मर्चेन्ट बैंकिङ्ग एन्ड फाइनान्स लि. लगायतले प्रवर्धन गरेका छन् । माबिलुङ्गका अध्यक्ष राजेश लाल श्रेष्ठ छन् । आयोजनामा कुल लागतको ७० प्रतिशत बैंकहरूको (६५ करोड ५९ लाख) र बाँकी ३० प्रतिशत कम्पनीको स्व. लगानी समान) रहनेछ ।

उक्त आयोजनाको लागि लक्ष्मी बैंकको ३९ करोड ९९ लाख, माछापुच्छ्रे बैंक लि.को २५ करोड ६० लाख ऋण लगानी रहेको छ ।

उत्पादन क्षमता ४.९५ मेगावाट रहेको माबिलुङ्ग इनर्जीले करिब २८.४१७ गेगावाटआवर विद्युत वार्षिक रुपमा उत्पादन गरी राष्ट्र्रिय प्रसारण लाइनमा जडान गर्ने लक्ष्य राखेको छ । यो आयोजना फेब्रुअरी २०२२ मा सञ्चालनमा आउने बताइएको छ । सेतोपाटी डटकम