ऊर्जामन्त्री रायमाझीले भने बूढीगण्डकी आयोजनाको काम अघि बढ्छ

प्रकाशित मिति : बुध, माघ २१, २०७७
- विद्युत संसार संवाददाता

काठमाडौं, माघ । ऊर्जा, जलस्रोत तथा सिँचाइमन्त्री टोपबहादुर रायमाझीले बूढीगण्डकी जलविद्युत् आयोजनाको निर्माण कार्यलाई अघि बढाइने बताएका छन् ।

मंगलबार मन्त्रालयमा आज आयोजित बूढीगण्डकी राष्ट्रिय सरोकार समितिका प्रतिनिधिसँगको छलफलमा कार्यक्रममा ऊर्जामन्त्री रायमाझीले अब छिटै आयोजनाको काम अघि बढाइने तयारी भएको बताएका हुन् ।

उनले भने आफू अघिल्लो पटक ऊर्जामन्त्री हुँदा आयोजनाको कामलाई अघि सारेको थिए ,अब छिट्टै नै शिलान्यास गरी निर्माण कार्य अघि बढाइने छ ।

अघिल्लो पटक मन्त्री भएको बेलामा पटक–पटक निर्माणस्थलमै गएर आयोजनाको अवलोकन गरी आयोजनामा आइपरेका समस्या तथा चुनौती हटाउने कार्यमा जुटेको थिए तर छोटो समयमै सरकार ढलेका कारण निर्माण कार्य अघि बढ्न नसकेको उनले बताए ।

मन्त्री रायमाझीले छलफलका क्रममा विभिन्न जलविद्युत् आयोजनाको निर्माण कार्य चलिरहेको भन्दै मुलुक अब विद्युत् बिक्री गर्ने अवस्थामा पुगेको बताए । आफू अघिल्लो पटक ऊर्जामन्त्री हुँदा ऊर्जा सङ्कट निवारणका लागि ९९ बुँदे कार्ययोजना बनाई लागू गरेकै कारण विद्युत् भार कटौती अन्त्य सम्भव भएको स्पष्ट पारे ।

कार्यक्रममा बूढीगण्डकी राष्ट्रिय सरोकार समितिका संयोजक हरेराम ढकालले घरजग्गाको ह्रासकट्टी र लाभ कर लिँदा स्थानीयवासीले उल्टै रकम बुझाउन पर्ने परिस्थितिको सिर्जना भएकाले ह्रासकट्टी र लाभकर विना जग्गाको मुआब्जा दिनुपर्ने बताए ।