जगदुल्ला आयोजनाको मुआब्जा वितरण सुरु

प्रकाशित मिति : Tue-17-Mar-2020
- Admin

जाजरकोट, चैत । जगदुल्ला जलविद्युत आयोजनाको मुआब्जा वितरण सुरु भएको छ । जाजरकोटमा निर्माण हुन लागेको १ सय ६ मेगावाट क्षमताको जगदुल्ला जलविद्युत आयोजना प्रभावित स्थानीयलाई मुआब्जा वितरण सुरु भएको हो ।

आयोजना प्रमुख सञ्जय सापकोटाका अनुसार विद्युत उत्पादन गृहस्थल मुड्केचुला गाउँपालिका–४ इल डोल्पाबाट मुआब्जा वितरण सुरु गरिएकोे बताए । पहिलो चरणमा इलस्थित स्थानीयवासीले मुआब्जा वितरण गर्ने र दोस्रो चरणमा चैत १४ गते काइगाउँमा वितरण गरिने आयोजना प्रमुख सापकोटाले जानकारी दिए ।

इल मा ६३ घरधुरीको ७१ रोपनी जग्गाको प्रतिरोपनी ५ लाख ५० हजार रुपैयाँका दरले मुआब्जा पाउनेछन् । त्यस्तै, काइगाउँमा १ सय घरधुरीका १ सय ८७ रोपनी जग्गालाई प्रतिरोपनी ५ लाख १५ हजार रुपैयाँका दरले मुआब्जा वितरण गरिने प्रमुख जिल्ला अधिकारी सुरेश सुनारले जानकारी दिए ।

आयोजनाको एक महिनाभित्र डिपिआरको प्रतिवेदन आउने प्रमुख सापकोटाले बताए ।

आयोजनाको विद्युत उत्पादनगृह मुड्केचुला गाउँपालिका–४ इलमा बन्नेछ भने जगदुल्ला गाउँपालिका वडा नं १ र २ मा ड्याम निर्माण गरिनेछ । पहिलो चरणमा २ सय ५८ रोपनी जग्गा अधिग्रहण गर्न लागिएको हो । अर्धजलाशयका रूपमा निर्माण कार्य थालिएको आयोजना ६ वर्र्षिभत्र निर्माण कार्य पूरा गर्ने लक्ष्य लिइएको छ ।

करिब ६.१ किलोमिटर भूमिगत सुरुङ निर्माण गरी इलस्थित ३ सय मिटरभित्र रहेको विद्युत् उत्पादनगृहमा खसालेर विद्युत् उत्पादन गर्ने लक्ष्य रहेको छ । जगदुल्ला गाउँपालिका–१ हुरिकोटमा २० मिटर उचाइको सय मिटर चौडाइ रहने जलाशययुक्त ड्याम निर्माण हुनेछ भने उक्त ड्यामको सय मिटर चौडाइ हुनेछ । डिपिआरको जिम्मा २७ करोडको लागतमा एनइए इन्जिनियरिङले लिएको थियो ।