रुदीखोला–बी जलविद्युत आयोजनाको विद्युत राष्ट्रिय प्रसारणमा थपियो

प्रकाशित मिति : Sun-02-Feb-2020
- विद्युत संसार सम्वाददाता

काठमाडौँ,माघ । लमजुङ जिल्लाको क्वहोलाछार गाउँपालिका–५ सिन्दीमा निर्माण गरिएको ६.६ मेगावाटको रुदीखोला–बी जलविद्युत आयोजनाको विद्युत राष्ट्रिय प्रसारणमा थपिएको छ ।

निजी क्षेत्रको लगानीमा विन्दवासिनी हाइड्रोपावर कम्पनीले निर्माण गरेको सो आयोजना उत्पादन भएको विद्युत राष्ट्रिय प्रसारणमा थपिएको हो ।

पछिल्ला दिनमा निजी क्षेत्रले निर्माण गरिरहेका जलविद्युत् आयोजना निर्माण सम्पन्न हुने क्रम बढेको छ । आयोजनाबाट उत्पादित बिजुली स्थानीय मिजुरेडाँडाको सवस्टेशनबाट राष्ट्रिय प्रसारण प्रणालीमा जोडिएको छ ।

१५ दिनसम्म परीक्षण प्रसारणका रुपमा विद्युत् उत्पादन कम्पनीले जनाएको छ । सो अवधिभर सरकारले बिजुलीको पैसा तिर्नुपर्दैन । परीक्षण प्रसारणको अवधि सकिएपछि व्यावसायिक उत्पादन शुरु हुने विन्दवासिनी हाइड्रोपावरका अध्यक्ष कृष्णप्रसाद आचार्यले जानकारी दिए ।

निर्माण शुरु भएको करीब दुई वर्षमै उत्पादन थालेको उक्त आयोजनाको प्रतिमेगावाट लागत रु १८ करोड पुगेको अध्यक्ष आचार्यले बताए । विन्दवासिनीले नै निर्माण गरेको ८.८ मेगावाटको रुदीखोला–ए जलविद्युत् आयोजनाले गत वर्षको चैतदेखि व्यावसायिक उत्पादन गर्दै आएको छ । यस्तै कूल ४८.८ मेगावाटको खिम्ती–२ जलविद्युत् आयोजनामा पनि विन्दवासिनी समूहले लगानी गरेको छ ।