नेपाल–भारत बीच दुईदिने ऊर्जा बैठक बस्दै, प्रसारणलाइन निर्माण र ऊर्जा आदानप्रदान मुख्य एजेण्डा

प्रकाशित मिति : आईत, मंसिर २१, २०७७
- विद्युत संसार संवाददाता

काठमाडौँ, मंसिर । नेपाल र भारत सरकारबीच ऊर्जासम्बन्धी संयुक्त कार्यदलको दुई दिने बैठक बस्ने भएको छ ।

दुई देश बीच यहि मंसिर २५ र २६ गते भर्चुअल माध्यमबाट ऊर्जा बैठक बस्ने भएको हो ।

बैठकको मूख्य एजेण्डा अन्तरदेशीय प्रसारण लाइन, ऊर्जा आदानप्रदान रहेका छन् । ऊर्जा, जलस्रोत तथा सिंचाई मन्त्रालय अनुसार यो बैठक सहसचिव र सचिवस्तरमा हुन लागेको संयुक्त कार्यदलको बैठक हो । विश्वभर फैलिएको कोभिड १९ को जोखिमका कारण अनलाइनमार्फत हुन लागेको मन्त्रालयले जनाएको छ । उक्त बैठकमा अघिल्ला बैठकहरुमा छलफल भएर पनि नटुङ्गिएका विषयहरुलाई आसन्न बैठकमा छलफल हुने मन्त्रालयले जनाएको छ ।

सन् २०१४ मा नेपाल–भारत विद्युत् व्यापार सम्झौता (पीटीए) भएपछि त्यसलाई कार्यान्वयन गर्ने क्रममा संयुक्त कार्यदल बनाइएको हो । यसअघि सात वटा बैठकहरु सम्पन्न भइसकेका छन् । बैठकमा यसअघि सहमति भएर कार्यान्वयन हुन बाँकी रहेका विषयहमा पनि छलफल हुने मन्त्रालयका स्रोतले जनाएको छ ।