आज देशभर ९७९ कोरोना संक्रमित थपिए, मृत्यु हुनेको संख्या ३०० पुग्यो

प्रकाशित मिति : सोम, भदौ २२, २०७७
- शिखर श्रेष्ठ

काठमाडौं । बितेको २४ घण्टामा काठमाडौं उपत्यकामा थप ३२६ जना सहित देशभर ९७९ जना कोरोनाभाइरस संक्रमित थपिएका छन् ।

काठमाडौंमा २९३ जना, ललितपुरमा २० र भक्तपुरमा १३ जनामा संक्रमण पुष्टि भएको स्वास्थ्य तथा जनसंख्या मन्त्रालयले जनाएको छ ।

यसैगरी देशभर सक्रिय संक्रमितको संख्या १६ हजार २५९ जना रहेको छ ।

जसमा संस्थागत आइसोलेशनमा ९ हजार ६९ जना रहेका छन् भने होम आइसोलेशनमा ७ हजार १९० रहेका छन् । यस्तै पछिल्लो २४ घण्टामा डिस्चार्ज हुनेको संख्या १ हजार ७३६ रहेको छ । यस्तै निको हुनेको कुल संख्या ३० हजार ६७७ जना पुगेको स्वास्थ्य मन्त्रालयको सोमबारको नियमित प्रेस ब्रिफिङमा मन्त्रालयका प्रवक्ता डा जागेश्वर गौतमले जानकारी दिए ।

आज ९,२१८ जनाको पीसीआर परीक्षण भएको छ भने हालसम्म ७ लाख ७७ हजार ५६३ जनाको पीसीआर परीक्षण भएको छ ।

यसैबीच कोरोनाबाट बितेको २४ घण्टामा थप ११ जनाको मृत्यु भएको छ। यससँगै मृतकको संख्या ३०० पुगेको छ।

त्यसैगरी देशभर कुल संक्रमितको संख्या ४७,२३६ पुगेको छ ।