वितरण केन्द्रलाई मिटर रिडिङ तथा महसुल काउन्टर सुचारु गर्न निर्देशन

प्रकाशित मिति : बिही, बैशाख २५, २०७७
- विद्युत संसार संवाददाता

विद्युत संसार ,वैशाख, काठमाडौं । नेपाल विद्युत प्राधिकरणले मिटर रिडिङ तथा विद्युत महसुल संकलन काउन्टर खोल्न निर्देशन दिएको छ । कोरोना भाइरस ९कोभिड–१९० को संक्रमण रोक्न गत चैत ११ गतेदेखि बन्द भएका यी सेवा सुचारु गर्न वितरण तथा ग्राहक सेवा निर्देशनालयलाई निर्देशन दिइएको हो ।

बैशाख २१ गते कार्यकारी निर्देशक स्तरीय निर्णय गरी सावधानी पूर्वक मिटर रिडिङ कार्य तथा महसुल संकलन काउन्टर सुचारु गर्न निर्देशन दिएको प्राधिकरणले जनाएको छ । कोभिड–१९ को असरले मिटर रिडिङ कार्य नहुँदा गत फागनुदेखिको विद्युत महसुल उठ्न बाँकी छ । अनलाइन सुविधा भएका ग्राहकले मात्रै महसुल तिरेका छन् ।

कार्यकारी निर्देशकको निर्देशनपछि निर्देशनालयले मातहतका सबै प्रादेशिक तथा प्रदेश डिभिजन कार्यालयलाई काम सुचारु गर्न सर्कुलर गरेको छ । निर्देशनालयको सर्कुलरपछि देशभरका वितरण केन्द्रले मिटर रिडिङ कार्य सुचारु गरेका छन् ।

काउन्टरको सेवा पनि सुचारु गरी महसुल संकलन गर्न थालेका छन् । मिटर रिडिङ तथा महसुल संकलन काउन्टर सञ्चालन गर्दा कर्मचारीलाई सावधानी अपनाउन भनिएको छ ।

ऊर्जा खबर