चैत भित्र माथिल्लो दोर्दी ‘ए’ आयोजनाबाट विद्युत उत्पादन हुने

प्रकाशित मिति : Mon-18-Feb-2019
- Admin

काठमाण्डौ, फागुन । लमजुङमा निर्माणाधिन २५ मेगावाट क्षमताको माथिल्लो दोर्दी ‘ए’ जलविद्युत आयोजनाबाट चैत्र भित्र विद्युत उत्पादन हुने भएको छ । करिब ९६ प्रतिशत काम सम्पन्न भइसकेको सो आयोजनाबाट चैत्र भित्र विद्युत उत्पादन हुने भएको हो ।

लबर्टी इनर्जी कम्पनी लिमिटेडले निर्माण गरिरहेको सो आयोजना गत साउनमा दोर्दी खोलामा आएको बाढीले केही क्षति पुर्याए पनि अहिले कामले गति लिएको छ ।

सञ्चालक रामबहादुर पाण्डेका अनुसार आयोजनाको अधिकांश निर्माण सकिएको र चैतभित्र बिजुली बाल्ने लक्ष्य अनुसार काम भइरहेको बताए ।

नेपाल विद्युत प्राधिकरणले आयोजनाको विद्युतगृह देखि करिब १ सय ३० मिटर टाढा १३२ र २२० केभीको सबस्टेसन निर्माण गरिरहेको छ । अधिकांश निर्माण पूरा भएकाले आयोजनाबाट विद्युत उत्पादन हुँदासम्म सबस्टेसन पनि तयार हुने आयोजना प्रमुख चिरन्तन राणाले बताए ।

आयोजनाबाट गत वर्ष नै विद्युत उत्पादन गर्ने लक्ष्य थियो । तर, स्थानीय समस्या, प्रसारण लाइन निर्माणको सुनिश्चितता नहुँदा विद्युत उत्पादन अवधि लम्बिएको थियो ।