काठमाण्डौ, मंसिर ।  नेपाल आयल निगमले  पेट्रोलियम पदार्थको मूल्यमा  वृद्धि गराएको छ । निगमले पेट्रोलियम पदार्थको खुद्रा मूल्य प्रतिलिटर २ रुपैयाँ बढाएको हो । भारतीय आयल कर्पोरेशन(आइओसी)ले पठाएको नयाँ मूल्य सूची अनुसार इन्धनको मुल्य बढेको जनाउँदै निगमले यहाँ पनि मूल्य बढाएको हो ।

 

नयाँ खरिद मूल्यमा केही बढेकाले सोमबार राति १२ बजेदेखि नै लागु हुनेगरी पेट्रोल, डिजेल र मट्टितेलको साविक बिक्री मूल्यमा प्रतिलिटर २ रुपैयाँ बढाएका निगमका प्रवक्ता विरेन्द्र गोइतले जानकारी दिए । नयाँ मूल्य सूची अनुसार उपत्यकामा पेट्रोलको खुद्रा बिक्री मूल्य १ सय ९ रुपैयाँ, डिजेल र मटितेलको ९७ रुपैयाँ तोकिएको छ । निगमका अनुसार आइओसीले खाना पकाउने एलपी ग्याँस र हवाइ इन्धनमा पनि मूल्य बढेको सूचि पठाएको छ । तर, एलपी ग्याँस र हवाई इन्धनको हकमा मूल्य यथावत राखेको प्रवत्ता गोइतले बताए ।