तनहुँ,मंसिर । तनहुँको व्यास नगरपालिकाले नगरक्षेत्रभित्र सम्पूर्ण काठका जीर्ण पोलहरु विस्थापन गरी स्टिलका पोल जडान गर्ने भएको छ । चौध वडा भएको सो नगरपालिकाभित्र काठका पोलले जोखिम बढाएपछि त्यस पोललाई हटाएर स्टिलका पोल राख्ने अभियान शुरु गरेको हो ।

 

नगरपालिकाले १४ वटै वडामा रहेको काठका पोलको तथ्याङ्क सङ्कलन गरेर पहिलो चरणमा प्रत्येक वडामा ४५ वटाका दरले स्टिलका पोल राख्ने अभियान शुरु गरिएको नगरपालिकाका प्रवक्ता मोहनकुमार श्रेष्ठले बताए । 

 

 

त्यस्तै वडा नं ७ का अध्यक्ष शतिश न्यौपानेले नगरपालिकाले उपलब्ध गराएका स्टिलका पोल वडामार्फत वितरण गर्न शुरु गरिएको जानकारी दिए । वडाभित्र बढी जीर्ण रहेका काठेपोल विस्थापनलाई पहिलो प्राथमिकतामा राखेर नगरपालिकाबाट उपलब्ध भएका ४५ स्टिलका पोल टोल विकास संस्थामार्फत वितरण गरी सकिएका उनले बताए ।

 

“प्राथमिकताका आधारमा टोल विकास संस्थामार्फत पहिलो चरणमा उपलब्ध भएका पोल वितरण ग¥यौँ”, वडाध्यक्ष न्यौपानेले भने, “बाँकी ठाउँमा पनि विस्तारै उपलब्ध गराउँदै जाने हाम्रो योजना छ ।” एकैपटकमा सबै ठाउँमा स्टिलपोल वितरण गर्न सम्भव नभएकाले प्राथमिकताका आधारमा काठेपोल फेरिने उनले बताए । काठका पोल कुहिँदा, जीर्ण हुँदा दुर्घटना हुने सम्भावना रहने भएकाले पहिलो चरणमा त्यस्ता ठाउँका काठेपोल विस्थापन गरिने न्यौपानेले बताए ।