मयाग्दी, कात्तिक ।  उत्पादित बिजुली सबस्टेसनमा चार्ज गरी केन्द्रीय प्रसारण लाइनमा जोड्न नपाउँदा जिल्लाका २ जलविद्युत् आयोजनाको १३ मेगावाट बिजुली खेर गइरहेको छ ।

 

 

अन्नपूर्ण गाउँपालिका–३ दाना तथा पर्वतको कुस्मास्थित खुर्कोट सबस्टेसन जोड्ने कालीगण्डकी करिडोर २२०र१३२ केभीए प्रसारण लाइन निर्धारित समयमा नबन्दा थापाखोलाको ८ मेगावाट र घलेम्दीको ५ मेगावाट बिजुली खेर गएको हो ।

 

घलेम्दी जलविद्युत् आयोजनाले असारमै टनेल, वेट तथा ड्राई, भोल्टेज तथा पावरको पुनस् परीक्षण तथा सबस्टेसनका पावर सप्लाई टेस्ट पूरा गरी विद्युत् पठाउने माध्यम नपाएकोले उत्पादन होल्ड गरी बसेको छ । ‘आयोजनाबाट उत्पादित बिजुली जोड्ने सबस्टेसन तयार नहुँदा २ महिनादेखि अलपत्र छौं । बैंकको ब्याज मिटरझैं घुमेकोघुमै छ,’ आयोजनाका कम्पनी सचिव विमल रिजालले भने, ‘यता उत्पादित बिजुली जोड्ने सबस्टेसन पाएनौ ।’

 

थापाखोलाको १३।६ मेगावाट विद्युत्मध्ये ५ मेगावाट म्याग्दीको अन्नपूर्ण गाउँपालिका–४ नारच्याङको घरापस्थित २ मेगावाट क्षमताको तातोपानी सानो जलविद्युत्को सबस्टेसनमा सिङक्रोनाइज गरी ३३ केभीए वनवे राष्ट्रिय प्रसारण लाइनमा चार्ज गरिएको छ ।

 

उत्पादित विद्युत् खेर मात्र गइरहेको छैन, सानो क्षमताको पुरानो प्रसारण प्रणालीमा ठूलो क्षमताको विद्युत् जोड्दा साविक धौलागिरिका पर्वत, बागलुङ, म्याग्दी र मुस्ताङमा पटकपटक विद्युत् अवरोध हुने समस्या देखिएको छ । कान्तिपुर दैनिक