काठमाण्डौं,साउन । म्याग्दीको अन्नपूर्ण गाउँपालिका–४ नारच्याङमा ४२ मेगावाट क्षमताको मिस्त्रि खोला जलविद्युत् आयोजनाको काम ९० प्रतिशत सम्पन्न भएको छ । रोवस्ट इनर्जी प्रा.लि.ले २०७३ साउनदेखि शुरु गरेको सोे आयोजनाबाट आगामी असोज मसान्त सम्ममा विद्युत उत्पादन हुने भएको हो ।  

नीलगिरि र घलेम्दी खोलाको दोभानमा बाँध रहेको यस आयोजनाको दुई हजार ३०० मिटर सुरुङमागबाट ल्याइने पानीलाई २८७ मिटर हेडबाट नारच्याङको बेँसीगाउँस्थित कालिगण्डकी नदीको किनारमा रहने विद्युत गृहमा खसालेर विद्युत् उत्पादन हुने भएको आयोजनाले जनाएको छ । 

यसअघि आयोजनाबाट भदौदेखि विद्युत उत्पादन गर्ने तालिका थियो । तर सुरुङ ढलानका क्रममा समस्या देखिएपछि उत्पादन तालिका एक महिना लम्बिएको व्यवस्थापक विजेन्द्रलाल राजभण्डारीले बताए । उनका अनुसार बाँध क्षेत्रको निर्माण पूरा गरी अहिले सुरुङ र विद्युतगृहमा समानरूपले काम भइरहेको छ । खनेर सकिएको २.३ किलोमिटर लामो मुख्य सुरुङमा ढलान भइरहेको छ । विद्युतगृहमा इलेक्ट्रोमेकानिकल उपकरण जडानको काम धमाधम भइरहेको छ । सो आयोजना सम्पन्न गर्न ६ अर्ब रुपैयाँ लागत अनुमान गरिएको छ ।