पोखरा, साउन । पोखरा महानगरपालिकाले भदौ १ गतेदेखि पोखराभित्र सञ्चालन हुने सार्वजनिक बसमा ‘ई–टिकेटिङ’ लागू गर्ने भएको छ । यातायात सेवालाई व्यवस्थापन गर्न ‘ई–टिकेटिङ’  भएको हो । महानगरका प्रमुख मानबहादुर जिसीले यातायात सेवालाई व्यवस्थापन गर्न महानगरपालिका ले विस्तृत योजना बनाइरहेको बताउँदै अबको छ महीनामा योजना तयार हुने र योजना अनुसार नै पोखरामा यातायात व्यवस्थापन गरिने  बताए । महानगरप्रमुख जिसीले दक्षिण एशियाली खेलकूद (साग)लाई दृष्टिगत गरेर पोखराका चार  वटा चोकमा ट्राफिक लाइट जडान गरिने जानकारी दिए । आगामी मंसिरभित्र सिर्जनाचोकमा आकाशे पुल बनिसक्ने र सागलाई नै ध्यानमा राखेर शहरका मुख्य ठाउँमा सिसिटिभी जडानको योजनासमेत बनाइएको बताए । ट्राफिक व्यवस्थापन चुनौतीपूर्ण भए पनि सुधार गरेर लैजान महानगर लागिपरेको पनि उनले बताए ।