माथिल्लो मिदिम आयोजना निर्माण हुदै

प्रकाशित मिति : Wed-31-Jul-2019
- Admin

काठमाण्डौ, साउन । ७.५ मेगावाट क्षमताको माथिल्लो मिदिम जलविद्युत आयोजना निर्माण हुने भएको छ । सो आयोजना भुजुङ्ग हाइड्रो पावर कम्पनीले निर्माण गर्ने भएको हो ।

आयोजना निर्माण प्रक्रिया अघि बढाउने क्रममा प्रारम्भिक वातावरणीय परीक्षण अध्ययन सुरु भएको कम्पनीले जनाएको छ । कम्पनीले वातावरणीय परीक्षण अध्ययनका क्रममा आयोजना निर्माण गर्दा स्थानीय क्षेत्रको भौतिक, साँस्कृतिक, आर्थिक तथा सामाजिक क्षेत्रमा पर्नसक्ने असरबारे सरोकारवालासँग रायरसुझाव मागेको छ ।

कम्पनीले सूचना जारी भएको मितिले ३५ दिनभित्र आइपुग्ने गरी सरोकारवालासँग रायरसुझाव मागेको हो । आयोजनाको बाँध मिदिम खोलाको बायाँ र विद्युतगृह दायाँ किनारमा रहने गरी संरचनाको डिजाइन तयार गरिएको छ । विद्युतगृहमा जडान हुने ३.७५ मेगावाट क्षमताका २ वटा टर्वाइनमा ३ फेजका २ वटा जेनेरेटर राखेर आयोजनाबाट विद्युत उत्पादन गरिने कम्पनीले जनाएको छ ।

२०७८ साउन १ गतेदेखि विद्युत उत्पादन उत्पादन गर्ने लक्ष्यसहित आयोजनाको निर्माण प्रक्रिया अघि बढाएको कम्पनीले जनाएको छ । आयोजनाले उत्पादन गर्ने विद्युत ३३ केभी प्रसारण लाइनमार्फत करिब २० किलोमिटर दुरीको नेपाल विद्युत प्राधिकरणको भोर्लेटार सबस्टेसनमा जोडिने छ ।