काठमाण्डौ,  साउन। जाजरकोटमा निर्माण हुन लागेको ४ सय १७ मेगावाट क्षमताको नलगाड जलाशययुक्त जलविद्युत आयोजनाको विस्तृत परियोजना प्रतिवेदन (डिपिआर)  अझै सम्म निर्माण हुन समेको   छैन । २४ महिना भित्र  डिपिआर सम्पन्न गर्ने लक्ष्यका साथ २०७३ मा  सम्झौता भएको  भए पनि ३९ महिना  वितिसक्दा समेत आयोजनाको डिपिआर सम्पन्न हुन नसकेको हो । 

आयोजनाको डिपिआर बनाउन अष्ट्रेलियन कम्पनी स्मेक, अमेरिकन कम्पनी एमडब्ल्युएच र नेपाली कम्पनी उदय कन्सल्ट्यान्टको जोइन्ट भेन्चरसँग परामर्श सेवा खरिद सम्झौता गरिएको थियो । 

तोकिएको समयमा उक्त कम्पनीले काम सम्पन्न नगरेपछि सम्झौताअनुसार ६ महिना म्याद थपिएको थियो । थपिएको समयमा परामर्शदाताले आयोजना स्थलमा ड्रिलिङ, टनेलिङलगायत काम सुरु गरेको थियो । ३० महिनामा पनि काम नसकिने भएपछि पुनः ६ महिना थप गरी आयोजनाको डिपिआर पूरा गर्ने म्याद ३६ महिना र्पुयाइएको हो  । ३६ महिनामा पनि डिपिआर नबन्ने भएपछि परामर्शदाता कम्पनीको मागअनुसार ३ महिना म्याद थपेर ०७६ साउनसम्म र्पुयाइएको छ ।