तामाकोसीले दियो स्थानीयलाई अत्याधुनिक एम्बुलेन्स

प्रकाशित मिति : Sun-21-Jul-2019
-

काठमाण्डौं,साउन । दोलखा निर्माणाधीन ४ सय ५६ मेगावाटको माथिल्लो तामाकोसी जलविद्युत आयोजनाको प्रवर्द्धक अप्पर तामाकोसी हाइड्रो पावर कम्पनीले स्थानीयलाई एम्बुलेन्स दिएको छ । कम्पनीले सामाजिक उत्तरदायित्व अन्तर्गत आयोजना प्रभावित बिगू गाउँपालिकालाई अत्याधुनिक एम्बुलेन्स दिएको हो ।

नेपाल विद्युत प्राधिकरणका कार्यकारी निर्देशक एवं कम्पनीका अध्यक्ष कुलमान घिसिङले ९० लाख रुपैयाँ मूल्यको एम्बुलेन्स गाउँपालिका अध्यक्ष युधिष्ठिर खड्कालाई आइतबार हन्तान्तरण गरे । स्थानीय बिरामीलाई सहजरूपमा अस्पतालसम्म पुर्याउन कम्पनीले कच्ची सडकमा पनि सजिलै चल्न सक्ने एम्बुलेन्स गाउँपालिकालाई हस्तान्तरण गरेको हो । गाउँपालिकालाई दिइएको एम्बुलेन्सबाट बिगूसहित उत्तरी दोलखाका गौरीशंकर र कालिन्चोक गाउँपालिकाले सेवा पाउने अध्यक्ष खड्काले बताए । एम्बुलेन्समा अत्याधुनिक उपकरण जडान भएकाले मुटुका बिरामीलाई पनि यही एम्बुलेन्सबाट अस्पताल पुर्याउन सकिने उनले बताए । सामाजिक उत्तरदायित्व कार्यक्रम अन्र्तगतको बजेट खर्च गरी स्थानीयलाई एम्बुलेन्स दिएको आयोजनाका प्रवक्ता गणेश न्यौपानेले बताए ।

उनका अनुसार सामाजिक उत्तरदायित्व अन्तर्गत आयोजना प्रभावित क्षेत्रमा पूर्वाधारण विकास तथा विद्युतीकरणको काम आयोजनाले गर्दै आएको छ । जिल्लाको उत्तरी भेगमा कच्ची सडकमा चल्ने एम्बुलेन्समा बिरामीको यात्रा कष्टकर हुने गरेको छ । वर्षामा हिलाम्मे सडकमा एम्बुलेन्स बिचबाटोमै बिग्रने समस्याले पनि स्थानीयलाई सास्ती हुने गरेको छ । तर, आयोजनाले दिएको एम्बुलेन्समा जस्तोसुकै सडकमा चल्नसक्ने हुँदा प्रभावकारी सेवा दिने स्थानीयको विस्वास छ । ऊर्जा खबर