काठमाण्डौ, असार । दोलखामा निर्माणाधिन सिंगटी जलविद्युत आयोजनाको ९५ प्रतिशत काम सम्पन्न भएको छ । २५ मेगावाट क्षमताको उक्त जलविद्युत आयोजनाबाट आगामी भदौ १५ सम्म विद्युत उत्पादन सुरु हुने भएको हो । 

 

आयोजनाका जनरल म्यानेजर रमेश अधिकारीका अनुसार आयोजनाबाट उत्पादन हुने विद्युत सिंगटी सबस्टेसनमा जोडिने र सबस्टेसनको काम पूर्णरुपमा सम्पन्न नभएको हुँदा  विद्युत उत्पादनमा ढिलाई भएको बताए । नेपाल विद्युत प्राधिकरणले प्रसारण लाइन तयार गरे साउनभित्रै एउटा युनिटबाट विद्युत थप हुने उनको भनाइ छ । आयोजनाबाट साउनदेखि विद्युत उत्पादन सुरु गर्ने भनिए पनि सबस्टेसन समयमा नै निर्माण नहुँदा सो आयोजनाको विद्युत उत्पादन मिति सरेको छ ।

 

आयोजना सम्पन्न गर्न ४ अर्ब रुपैयाँ लागत लाग्ने अनुमान छ । आयोजनामा सिभिल बैंकको अगुवाईमा ९ बैंकले ७० प्रतिशत ऋण लगानी गरेका छन्  भने ३० प्रतिशत स्वपुँजी लगानी रहेको छ । आयोजनाबाट उत्पादन भएको विद्युत २ सय मिटर टाढाको सिंगटी सबस्टेसनमा जोडिनेछ ।