माथिल्लो कर्णालीको विद्युत बंगलादेश निर्यातको पहल हुँदै

प्रकाशित मिति : Mon-24-Jun-2019
- Admin

काठमाण्डौ, असार । माथिल्लो कर्णाली आयोजनाको विद्युत बंगलादेश निर्यात गर्न पहल हुँदैछ । नौ सय मेगावाटको क्षमताको उक्त आयोजनाको लाइसेन्स पाएको भारतीय कम्पनी जीएमआरले पाँच सय मेगावाट विद्युत बंगलादेश निर्यात गर्न बंगलादेशसँग पीपीए गर्न खोजेको हो ।

लामो समयदेखि लाइसेन्स होल्ड गरिरहेको जीएमआरले हालसम्म लगानी व्यवस्थापन समेत गर्न सकेको छैन् तर पाँच सय मेगावाट विद्युत भारत हुँदै बंगलादेश निर्यात गर्न खोजिरहेको हो ।

नेपाल–बंगलादेशबीच सम्पन्न सचिवस्तरिय संयुक्त सञ्चालक समितिको दोस्रो बैठकमा बंगलादेशले यस्तो जानकारी गराएको उर्जा मन्त्रालयका सचिव दिनेश घिमिरेले बताए ।

आयोजनाबाट उत्पादित मध्ये ५ सय मेगावाट विद्युत बंगलादेश निर्यात गर्ने सम्बन्धी विषयलाई अनुमोदन पनि गरेको उनले बताए ।

जीएमआरले लगानी व्यवस्थापन गरी बंगलादेश विद्युत पठाउँन सके अन्य आयोजनाबाट समेत बंगलादेश विद्युत निर्यात गर्न सहज हुने विश्वास मन्त्रालयको छ ।

बंगलादेश र जीएमआरबीच विद्युत महसुल दरका विषयमा बाहेक अन्य विषयमा दुई पक्षबीच करिब सहमती भएको जनाइएको छ ।

संयुक्त सञ्चालक समितिको बैठकले नेपाल र बंगलादेशबीच नविकरणीय उर्जाको क्षेत्रमा सहयोग गर्ने सम्बन्धी निर्णय अनुमोदन गरेको सचिव घिमिरेले बताए ।