दमौली,  कात्तिक । जनताको गुनासो सुन्नका लागि  तनहुँको भानु नगरपालिकाले मोबाइल एप्स सञ्चालनमा ल्याएको छ । जनताले राखेको गुनासो सुनुवाइका लागि नगरपालिकाले मोबाइल एप्स सञ्चालनमा ल्याएको हो । 
नगरपालिकाका प्रमुख उदयराज गौलीका अनुसार नगरपालिकाको नीति, कार्यक्रम, योजना तथा बजेट र कार्यालयले सम्पादन गर्ने कार्यको विषयमा जानकारी गराउने उद्देश्यले मोबाइल एप्स सञ्चालनमा ल्याइएकोे बताए । 
प्रविधिको विकाससँगै मोबाइल एप्सको प्रयोग बढेकाले सर्वसाधारणको सहजताका लागि आफ्नै एप्स सञ्चालनमा ल्याएको नगरपालिकाले जनाएको छ । सबैका हातमा मोबाइल फोन रहेको अहिलेको अबस्थामा  मोबाइलको प्रयोग गरेर सबै सुविधाको विषयमा जानकारी दिन एप्स बनाएको नगर प्रमुख गौलीले जानकारी दिए । उनले नगरका काममा पारदर्शिताको लागि मोबाइल एप्स एउटा राम्रो प्रयोग हुने बताए ।  
सूचना प्रविधि अधिकृत अजन्ता ढकालका अनुसार मोवाइल एप्समा नगरपालिकाको परिचय, नगरपालिकाकाले दिने सेवा, कार्यक्रम तथा परियोजना, सूचना तथा जानकारी, ऐन कानून, वडा विवरण, महत्वपूर्ण स्थान, आपतकालीन नम्बर समावेश गरिएकोे बताए ।