उर्लाबारी (मोरङ), सौर्य ऊर्जामा अनुदान दिएपछि उत्तरी मोरङको वारङ्गी गाउँ विकास समितिका ९५ प्रतिशत जनताले सौर्य बत्ती जडान गरेका छन् । जिल्ला विकास समिति तथा वैकल्पिक ऊर्जा कार्यक्रम र गाउँ विकास समितिले अनुदान दिएपछि वारङ्गीका अधिकांश गाविसवासीले सोलार बत्ती जडान गरेका हुन् । रु १० हजार मूल्य पर्ने एउटा सोलारमा जिविस मोरङले रु तीनहजारदेखि साढे तीन हजार,  वैकल्पिक ऊर्जाले रु चार हजार तथा गाउँ विकास समितिले रु ५०० अनुदान दिने  गरेको छ । उज्यालो कार्यक्रमअन्तर्गत स्थानीय  उपभोक्ताले सोलार जडान गर्दा रु दुई हजार मात्र व्यहोर्नु पर्ने हुन्छ । सहज अनुदान पाएपछि सो गाउँ विकास समितिका ६५० घरधुरीमध्ये ५७५ घरधुरीले सोलारको प्रयोग गरेको छ । विशेष कार्यक्रम सञ्चालन गरेर बाँकी रहेका घरधुरीमा पनि सौर्य ऊर्जा बत्ती जडान गरिने जिविसले जनाएको छ ।